Armando Toma

Ministria e Punëve të Brendshme

Armando Toma është Përgjegjës i Sektorit të Programimit, Hartimit dhe Harmonizimit të Akteve Rregullatore në Ministrinë e Punëve të Brendshme, detyrë që e ushtron prej majit 2024.

Ai iu bashkua administratës publike në vitin 2019 përmes nismës “Thirrja e I-rë për studentët ekselentë”, një mekanizëm i krijuar për të afruar në shërbimin publik të rinj të kualifikuar dhe të motivuar. Pas përfundimit të kontratës njëvjeçare, përfitoi statusin e nëpunësit civil duke vijuar më tej angazhimin si specialist në përfaqësimin ligjor të institucionit.

Armando u promovua në pozicion drejtues, duke marrë përgjegjësinë për koordinimin e proceseve që lidhen me programimin, hartimin dhe harmonizimin e akteve rregullatore, me fokus garantimin e cilësisë dhe përputhshmërisë ligjore të tyre.

Gjatë karrierës së tij, ai ka ndjekur një sërë trajnimesh dhe programesh zhvillimi profesional në fusha si lidershipi, artikulimi publik, mirëadministrimi i procedurave, inovacioni, përdorimi i teknologjisë për rritjen e efikasitetit institucional, si dhe në fusha të ndryshme të së drejtës.

Përmes angazhimit të tij profesional, Armando kontribuon në forcimin e shtetit të së drejtës dhe në përmirësimin e kuadrit rregullator institucional. Ai mbetet i orientuar drejt kualifikimit të vazhdueshëm dhe ofrimit të një kontributi teknik e profesional të qëndrueshëm në shërbim të administratës publike.

Lidja Lapi

Programi Kombëtar i Praktikave të Punës

Lidja Lapi është një e re që beson fort se ndryshimi fillon nga vetja dhe se çdo përvojë është një hap drejt një versioni më të fortë dhe më të vetëdijshëm të vetes.

E diplomuar në Shkenca Politike dhe Marrëdhënie Ndërkombëtare, Lidja ka ndërtuar rrugëtimin e saj akademik mbi një interes të thellë për çështjet sociale, politikat publike dhe të drejtat e fëmijëve dhe të rinjve. Por për të, dija nuk ka qenë kurrë vetëm teori, duke kërkuar vazhdimisht ta zbatojë atë në praktikë dhe ta lidhë me realitetin.

Një nga eksperiencat që ka lënë gjurmë në formimin e saj profesional ishte angazhimi pranë Children’s Rights Centre Albania. Aty, Lidja u përfshi në iniciativa dhe projekte që lidhen me advokimin dhe të drejtat e fëmijëve, duke kuptuar nga afër rëndësinë e përgjegjësisë sociale dhe fuqinë e punës në ekip. Kjo eksperiencë e ndihmoi të qartësojë edhe më shumë drejtimin e saj: të jetë pjesë aktive e proceseve që sjellin ndryshim real në komunitet.

Rrugëtimi i saj vijoi me një tjetër hap të rëndësishëm, si praktikante pranë Agjencisë Kombëtare të Rinisë, mundësi që iu dha nëpërmjet Programit Kombëtar të Praktikave të Punës. Për tre muaj, Lidja u përball me sfida të reja, si dhe mori iniciativa për të mësuar dhe për t’u zhvilluar profesionalisht.

Pas përfundimit të praktikës 3-mujore, Lidja do të vijojnë rrugëtimin e saj profesional me kontratë 1-vjeçare në institucionin ku dëshmoi aftësi, seriozitet dhe përkushtim. Ky nuk është vetëm një lajm i mirë për të, por edhe një dëshmi se kur të rinjtë mbështeten dhe u jepet hapësira për t’u zhvilluar, ata dinë ta kthejnë mundësinë në sukses.

Devis Nashi

Programi Kombëtar i Praktikave të Punës

Devis Nashi është një profesionist i ri që ka ndërtuar rrugëtimin e tij në administratën publike përmes përkushtimit, seriozitetit dhe dëshirës për zhvillim të vazhdueshëm profesional.

Pas përfundimit me sukses të praktikës 3-mujore pranë Ministrisë së Bujqësisë dhe Zhvillimit Rural, ai u përzgjodh për të vijuar angazhimin me kontratë njëvjeçare, duke dëshmuar se performanca dhe puna e palodhur vlerësohen.

Devisi është diplomuar në Universitetin Bujqësor të Tiranës, në Fakultetin e Mjekësisë Veterinare, formim akademik që i ka shërbyer si bazë e qëndrueshme për kontributin e tij profesional në fushën veterinare dhe administrative.

Gjatë angazhimit të tij në ministri, ai ka qenë pjesë e proceseve të rëndësishme në Sektorin e Mirëqenies dhe Shëndetit të Kafshëve, si edhe në Sektorin e Epidemiologjisë, Regjistrimit dhe Identifikimit të Kafshëve. Puna e tij është fokusuar në monitorimin e situatës epidemiologjike, analizimin dhe përpunimin e të dhënave, zbatimin e procedurave teknike, si dhe mbështetjen e proceseve administrative në përputhje me legjislacionin në fuqi.

Ai ka kontribuar gjithashtu në procesin e auditimit nga Bashkimi Europian, në përgatitjen e dokumentacionit përkatës dhe në vlerësimin e sistemit veterinar. Një pjesë e rëndësishme e angazhimit të tij ka qenë edhe puna për përafrimin e rregulloreve të acquis të BE-së me legjislacionin shqiptar, duke mbështetur harmonizimin e standardeve veterinare me ato europiane.

Në funksion të rritjes së tij profesionale, Devisi ka ndjekur trajnime të specializuara të organizuara nga Shkolla Shqiptare e Administratës Publike dhe European Commission for the Control of Foot-and-Mouth Disease. Këto përvoja kanë kontribuar në forcimin e aftësive të tij profesionale dhe në përgatitjen për sfidat që lidhen me sigurinë dhe shëndetin veterinar.

Historia e Devis Nashit është një dëshmi se Programi i Praktikave të Punës mund të shërbejë si një urë konkrete drejt një karriere profesionale në administratën publike.

Stela Haxhi

Ministria e Drejtësisë

Stela Haxhi  është profesioniste e administratës publike me eksperiencë në zhvillimin e politikave, monitorimin e projekteve dhe procesin e integrimit evropian. Aktualisht ajo shërben si Përgjegjëse e Sektorit për Monitorimin e Projekteve IPA dhe Donatorëve në Fushën e Drejtësisë pranë Ministrisë së Drejtësisë, ku koordinon dhe monitoron iniciativa të financuara nga Bashkimi Evropian dhe donatorë ndërkombëtarë që synojnë forcimin e shtetit të së drejtës dhe avancimin e reformave në sistemin e drejtësisë. Në këtë rol, ajo ndjek gjithashtu zbatimin e Reform and Growth Facility, një instrument i financuar nga Bashkimi Evropian.

Më herët, Stela ka punuar për disa vite si specialiste në Bashkinë e Tiranës, duke kontribuar në fushën e komunikimit dhe ofrimit të shërbimeve publike. Ajo ka fituar përvojë në vendet e Bashkimit Evropian edhe përmes një praktike profesionale në Departamentin e Koordinimit të Politikave Evropiane në Rajonin Emilia-Romagna, në Bolonjë, Itali (Autoriteti Menaxhues i programit IPA ADRION), ku ka punuar në koordinimin e politikave evropiane, zhvillimin territorial dhe politikën e kohezionit.

Stela ka qenë pjesë e programit Young Cells Albania, një iniciativë e Departamentit të Administratës Publike për zhvillimin profesional të të rinjve në administratën shqiptare, si dhe e programit rajonal WeLead – EU Scheme for Young Professionals in the Western Balkans, të fokusuar në forcimin e lidershipit dhe bashkëpunimit rajonal në administratën publike, i zbatuar nga Center of Excellence in Finance (CEF).

Ajo është autore e policy paper-it “Përmirësimi i implementimit të EUSAIR në Shqipëri”, publikuar në koleksionin WeWrite: Shaping the Future nga Center of Excellence in Finance (CEF) dhe prezantuar në Bled Strategic Forum 2025.

Ajo është gjithashtu anëtare e WeLead Network of Leaders of the Future, Network of Regional Experts (NRE) dhe Konventës Kombëtare për Integrimin Evropian.

Stela Haxhi mban një diplomë Master Shkencor në Gender and Development dhe një diplomë Bachelor në Punë dhe Politika Sociale nga Universiteti i Tiranës. Ajo ka përfunduar gjithashtu Akademinë e Integrimit Evropian dhe Negociatave (AIEN) – Shteti i së Drejtës, Edicioni II, si dhe ka ndjekur trajnime të specializuara në administratën publike dhe integrimin evropian në Institut National du Service Public (INSP), Francë dhe Shkollën Rajonale të Administratës Publike (ReSPA).

Aktualisht, ajo po ndjek studimet ekzekutive “EU Membership and Accession Negotiations” pranë Institutit të Studimeve Evropiane në Universitetin e Tiranës.

Në rolin e saj aktual në Ministrinë e Drejtësisë, ajo kontribuon në avancimin e reformave në fushën e drejtësisë dhe në zbatimin e prioriteteve të lidhura me procesin e integrimit evropian.