Vilma Guri

Drejtor i Departamentit të Administratës Publike

Znj. Vilma Guri mban pozicionin e Drejtorit të Departamentit të Administratës Publike (DAP) që prej dhjetorit 2025. Znj. Guri sjell në këtë funksion një përvojë të gjatë dhe të konsoliduar në qeverisjen e mirë, sigurinë ndërkombëtare dhe ndërtimin e kapaciteteve institucionale, të fituar përgjatë më shumë se dy dekadave angazhimi profesional në programe kombëtare dhe ndërkombëtare.

Gjatë periudhës shkurt–nëntor 2025, znj. Guri ka shërbyer si Këshilltare e Kryeministrit për Administratën Publike, duke kontribuar në ofrimin e këshillimit strategjik për reformat në administratën publike, forcimin e qeverisjes së mire, rritjen e efikasitetit institucional dhe përafrimin e praktikave administrative me standardet evropiane dhe ndërkombëtare.

Nga viti 2009 deri në dhjetor 2024, znj. Guri ka përfaqësuar Programin e Kontrollit të Eksporteve dhe Sigurisë Kufitare (EXBS) të Departamentit të Shtetit të Shteteve të Bashkuara të Amerikës, duke u bërë eksperte për zhvillimin, zbatimin dhe mbikëqyrjen e politikave të tregtisë strategjike. Në këtë kuadër, ajo ka punuar për forcimin e respektimit të standardeve ndërkombëtare në fushën e kontrolleve të eksportit, mospërhapjen e armëve të shkatërrimit në masë dhe sigurinë ndërkufitare.

Portofoli i saj ka përfshirë Ballkanin Perëndimor, ku ajo ka udhëhequr nisma të rëndësishme për ngritjen e kapaciteteve institucionale dhe bashkëpunimin rajonal në këto fusha kyçe. Si Përfaqësuese Rajonale e Programit EXBS, znj. Guri ka sjellë përvojë të thelluar edhe në fushat e zbatimit të sanksioneve, monitorimin e Investimeve të Drejtpërdrejta të Huaja (FDI) dhe luftën kundër financimit të veprimtarive që lidhen me përhapjen e armëve të shkatërrimit në masë. Ajo ka kontribuar drejtpërdrejt në hartimin e zgjidhjeve strategjike që synojnë forcimin e sigurisë ndërkombëtare dhe stabilitetin ekonomik.

Znj. Guri është instruktore e certifikuar dhe e akredituar nga Instituti i Shërbimit të Jashtëm (FSI) i Departamentit të Shtetit të SHBA, e specializuar në ofrimin e trajnimeve për aftësi menaxhimi për zyrtarët e Shërbimit të Jashtëm në ambasadat amerikane në Evropë. Trajnimet e saj janë të orientuara drejt zhvillimit të kapaciteteve drejtuese dhe menaxheriale, të përshtatura për mjediset diplomatike dhe institucionale.

Në periudhën 2002–2009, znj. Guri ka shërbyer si Asistente Programi pranë Programit Ndërkombëtar të Ndihmës për Trajnimin e Hetimeve Penale (ICITAP) të Departamentit të Drejtësisë të SHBA, me fokus të veçantë në çështjet e sigurisë detare dhe sigurisë aeroportuale.

Znj. Guri është certifikuar në Akademinë e Kontrollit të Eksporteve të Universitetit të Xhorxhias, SHBA, dhe ka ndjekur trajnime të avancuara të Institutit të Shërbimit të Jashtëm (FSI) për çështje politike, lidership, menaxhim programesh, si dhe monitorim dhe vlerësim të programeve dhe zbatuesve të tyre. Znj. Guri ka përfunduar studimet universitare dhe pasuniversitare në Studime të Gjuhës Angleze në Universitetin e Tiranës, flet rrjedhshëm anglisht dhe italisht dhe ka njohuri të mira të spanjishtes dhe gjermanishtes.

Enkela Dudushi

Njësia e Politikave dhe Programeve të Zhvillimit të Administratës Publike

Znj. Enkela Dudushi ka një përvojë mbi 25-vjeçare në administratën publike shqiptare, me fokus në menaxhimin dhe zhvillimin e administratës shtetërore.

Që prej dhjetorit 2025, ajo mban pozicionin e Drejtorit të Njësisë së Politikave dhe Programeve të Zhvillimit të Administratës Publike. Për dy vitet e fundit (2023 - 2025) znj. Dudushi ka ushtruar funksionin e Drejtorit të Departamentit të Administratës Publike (DAP), duke drejtuar procese kyçe të reformës në administratën publike dhe forcimit të kapaciteteve institucionale.

Formimi akademik dhe karriera

Znj. Dudushi është diplomuar në degën “Administrim Biznes” pranë Fakultetit të Ekonomisë, Universiteti i Tiranës, në vitin 1993. Karriera e saj 25- vjeçare në administratën publike ka filluar nga pozicioni i specialistit, për të arritur deri në pozicione drejtuese.

Prej vitit 2008 deri në nëntor 2023, ka mbajtur rolin e Drejtorit të Drejtorisë së Politikave të Zhvillimit të Administratës Publike në Departamentin e Administratës Publike. Gjatë kësaj periudhe, znj. Dudushi ka drejtuar gjithashtu si Drejtore e Deleguar, Shkollën Shqiptare të Administratës Publike (ASPA), ku ka luajtur një rol të rëndësishëm në rritjen dhe zhvillimin e kapaciteteve institucionale.

Ekspertiza dhe angazhimet

Fusha e ekspertizës së znj. Dudushi përfshin:

• Menaxhimin e burimeve njerëzore (trajnere e certifikuar)

• Politikat e pagave dhe menaxhimin e sistemeve të pagave

• Rritjen e kapaciteteve institucionale

Ajo ka qenë pjesë e disa grupeve të punës dhe trupave profesionale, si në qeverinë shqiptare ashtu edhe me organizata ndërkombëtare si IMF (International Monetary Fund) dhe ILO (International Labour Organization).

Keida Meta

Drejtoria e Politikave dhe Zhvillimit të Administratës Publike

Keida Meta ka një karrierë profesionale rreth 12 vjeçare, e orientuar kryesisht në menaxhimin e burimeve njerëzore dhe zhvillimin institucional në sektorin publik. Që prej vitit 2015, ajo është angazhuar pranë Departamentit të Administratës Publike, duke filluar nga pozicioni Specialist në Sektorin e Procedurave të Rekrutimit dhe duke avancuar gradualisht në pozicionet Përgjegjës i Sektorit të Procedurave të Rekrutimit, Përgjegjës i Sektorit të Politikave të Zhvillimit në Fushën e Menaxhimit të Burimeve Njerëzore, Përgjegjës i Sektorit të Politikave të Zhvillimit për Institucionet, Pagat dhe Menaxhimin e Burimeve Njerëzore dhe aktualisht Drejtor i Drejtorisë së Politikave të Zhvillimit të Administratës Publike.
Në vitet 2014-2015, ajo ka ushtruar detyrën e Drejtorit të Drejtorisë së Burimeve Njerëzore, në Këshillin e Qarkut Durrës.

Ekspertiza e saj përfshin:

• hartimin dhe zbatimin e politikave në fushën e menaxhimit të burimeve njerëzore në administratën publike;
• zhvillimin e politikave institucionale dhe të organizimit të brendshëm;
• hartimin e projektakteve ligjore e nënligjore, si dhe dhënien e mendimeve teknike për to.

Gjatë karrierës, Keida Meta ka ndjekur trajnime të specializuara brenda dhe jashtë vendit, të fokusuar në menaxhimin e burimeve njerëzore, administrimin publik, integrimin evropian, hartimin e legjislacionit dhe lidership.
Ajo zotëron diplomë universitare dhe pasuniversitare në fushën e drejtësisë dhe administrimit publik, duke përfshirë një Diplomë të Integruar të Nivelit të Dytë në Drejtësi, një Master të Nivelit të Dytë në të Drejtën Kushtetuese të Krahasuar dhe Evropiane, si dhe një Master Profesional në Administrim Publik. 

Ened Kerçini

Drejtoria e Programeve të Reformës në Administratën Publike

Ened Kërçini ka një karrierë profesionale që shtrihet në mbi 30 vite, me më shumë se 15 vite përvojë në menaxhimin dhe zbatimin e projekteve, si dhe në zhvillimin e zgjidhjeve teknologjike në sektorin publik dhe administratën shtetërore. Që prej vitit 2013, ai është angazhuar në Departamentin e Administratës Publike, fillimisht si shef sektori dhe më pas duke avancuar në pozicione drejtuese, duke mbajtur që prej vitit 2017 pozicionin e Drejtorit të Drejtorisë së Programeve të Reformës në Administratën Publike.

Gjatë periudhës 2013–2017, ai ka drejtuar Drejtorinë e Teknologjisë së Informacionit, duke kontribuar në zhvillimin dhe zbatimin e projekteve për modernizimin e administratës publike.

Ekspertiza e tij profesionale përfshin:

• mbi 30 vite përvojë në fushën e teknologjisë së informacionit në sektorin privat dhe publik;
• mbi 10 vite përvojë në zhvillimin dhe menaxhimin e programeve dhe projekteve në administratën publike;
• kontribut në zbatimin e legjislacionit dhe akteve nënligjore në fusha të ndryshme që lidhen me modernizimin institucional.

Gjatë gjithë karrierës së tij, ai ka ndjekur trajnime të specializuara në menaxhimin e sektorit publik, modernizimin dhe inovacionin në administratë, si dhe në çështjet e integrimit evropian.

Para angazhimit në administratën publike, ai ka mbajtur pozicione drejtuese teknike në sektorin privat, të lidhura me projekte në fushën e sigurisë, bankave dhe identitetit elektronik, si dhe ka ushtruar funksione drejtuese teknike dhe marketingu në Drejtorinë e Albtelecom në fushën e telekomunikacionit për gati tre vite.
Ai zotëron një diplomë universitare në Inxhinieri Elektronike nga Universiteti Politeknik i Tiranës.

Marçela Kërëku

Drejtoria e Integritetit, Mbikqyrjes dhe Ankesave Administrative e Gjyqësore

Marcela Kërëku është profesioniste me mbi 27 vite përvojë pune, nga të cilat më shumë se 15 vite të specializuara në menaxhimin e burimeve njerëzore, integritetin institucional dhe zhvillimin e administratës publike. Që prej vitit 2003, ajo ka qenë e angazhuar në institucione qendrore të administratës publike, përfshirë Ministrinë e Drejtësisë, Drejtorinë e Përgjithshme të Arkivave dhe Departamentin e Administratës Publike (DAP).

Gjatë karrierës së saj, znj. Kërëku ka mbajtur funksione drejtuese dhe inspektuese me përgjegjësi të larta, si Inspektor i Përmbarimit, Inspektor Gjyqësor, Drejtor Kabineti në Ministrinë e Drejtësisë, Shef Sektori dhe më pas Drejtor në Departamentin e Administratës Publike. 
Aktualisht, prej vitit 2018, ajo ushtron funksionin e Drejtorit të Integritetit, Mbikëqyrjes, Ankesave Administrative dhe Gjyqësore pranë DAP-it, ku fokusohet në zbatimin e legjislacionit të shërbimit civil, forcimin e integritetit institucional, trajtimin e ankesave dhe hartimin e politikave të burimeve njerëzore.

Ekspertiza e saj përfshin hartimin e politikave dhe standardeve të menaxhimit të shërbimit civil, mbikëqyrjen e proceseve disiplinore dhe gjyqësore ku palë janë institucionet shtetërore, si dhe monitorimin e zbatimit të Ligjit nr. 152/2013 “Për nëpunësin civil”. Ajo ka kontribuar në përgatitjen e manualeve, udhëzuesve dhe praktikave të unifikuara në fushat e integritetit, etikës dhe disiplinës në administratën publike.

Që prej vitit 2021, znj. Kërëku është trajnere pranë Shkollës Shqiptare të Administratës Publike, në fushat e Kodit të Procedurave Administrative dhe Etikës në Administratën Publike. Ajo ka ndjekur dhe përfituar trajnime të shumta kombëtare dhe ndërkombëtare në menaxhimin e sektorit publik, integrimin evropian, qeverisjen e mirë dhe integritetin institucional, përfshirë programe prestigjioze pranë JICA në Japoni dhe European University Institute në Itali.
Znj. Kërëku është diplomuar në Gjuhë dhe Letërsi Shqipe dhe në Drejtësi në Universitetin e Tiranës, mban titullin “Avokat”, një Master Shkencor në të Drejtën Publike, si dhe specializime të avancuara ndërkombëtare në të drejtën dhe administrimin publik.

Migena Braçe

Drejtoria e Procedurave të Rekrutimit në Shërbimin Civil

Migena Braçe është profesioniste me mbi dhjetë vite përvojë në fushën e menaxhimit të burimeve njerëzore dhe zhvillimit institucional në sektorin publik. Që prej vitit 2016 ajo është e angazhuar pranë Departamentit të Administratës Publike, ku ka ushtruar fillimisht detyrën e Specialistes dhe aktualisht mban pozicionin e Drejtorit të Drejtorisë së Procedurave të Rekrutimit në Shërbimin Civil. Në periudhën 2015–2016 ajo ka kontribuar gjithashtu në një institucion tjetër publik, në funksione të lidhura ngushtë me menaxhimin e burimeve njerëzore, duke forcuar më tej përvojën e saj në administrimin e proceseve të ciklit të karrierës në administratën publike.

Ajo është diplomuar në Universitetin e Romës “La Sapienza”, Itali, në fushën e menaxhimit të burimeve njerëzore, me profil në burime njerëzore, psikologji organizative dhe të punës. Ky formim akademik i ka ofruar një bazë të qëndrueshme teorike dhe praktike në analizën organizative, menaxhimin e performancës dhe projektimin e ndërhyrjeve profesionale në mjedisin e punës.

Në kuadër të detyrës së saj, Migena Braçe ka qenë e përfshirë drejtpërdrejt në zbatimin dhe përmirësimin e procedurave të rekrutimit dhe të menaxhimit të karrierës në shërbimin civil, në zhvillimin e proceseve moderne të burimeve njerëzore në administratën publike, si dhe në hartimin e akteve ligjore dhe nënligjore, udhëzimeve dhe dokumenteve standarde që rregullojnë këtë fushë. Ajo ka kontribuar gjithashtu në monitorimin e zbatimit të legjislacionit për shërbimin civil dhe në ofrimin e mbështetjes institucionale për rritjen e efikasitetit administrativ, si edhe në analizën e nevojave për rekrutim të institucioneve shtetërore dhe përgatitjen e planit vjetor të rekrutimit.

Gjatë karrierës së saj profesionale, ajo ka ndjekur trajnime të specializuara në menaxhimin e burimeve njerëzore dhe në proceset e integrimit evropian, veçanërisht në kuadër të Reformës në Administratën Publike, duke përditësuar vazhdimisht njohuritë dhe praktikat e saj profesionale në përputhje me standardet bashkëkohore.

Elida Sokoli

Drejtoria Ekonomike dhe Shërbimeve Mbështetëse